“සියලු දෙනා ම කියවිය යුතු පොලිස් පණිවුඩයක්” යනුවෙන් ශ්‍රී ලංකා පොලිසිය විසින් නිකුත් කළ බව කියන කරුණු 22ක් ඇතුළත් පණිවුඩයක් මේ දිනවල වට්ස්ඇප් (Whatsapp) පණිවුඩ ජාලය තුළ සංසරණය/හුවමාරු වන අයුරු නිරීක්ෂණය විය.
එලෙස හුවමාරු වූ වට්ස්ඇප්(Whatsapp) පණිවුඩයේ තිර ඡායාරූප(Screenshots) කිහිපයක් පහතින් දක්වා ඇත.
මෙවැනි කිසිදු පණිවුඩයක් ශ්‍රී ලංකා පොලිසිය විසින් නිකුත් කර නොමැති බව පොලිසිය මාධ්‍ය නිවේදනයක් නිකුත් කරමින් සඳහන් කළේ ය.
පොලිස් මාධ්‍ය කොට්ඨාශය මාර්තු 12 වැනිදා පස්වරුවේ මේ සම්බන්ධයෙන් නිවේදනයක් නිකුත් කර තිබිණි.
මෙම ව්යාජ පණිවුඩය සම්බන්ධයෙන් පොලිස් මාධ්‍ය කොට්ඨාසය නිකුත් කරන ලද නිවේදනය පහතින් දක්වා ඇත.
ඉහතින් දක්වා ඇති වට්ස්ඇප් පණිවුඩය හෝ එහි ඇතුළත් කරුණු හෝ සඳහන් කරමින් ශ්‍රී ලංකා පොලිසිය මාධ්‍ය වෙත හෝ සමාජ මාධ්‍ය වෙත හෝ කිසිදු පණිවුඩයක් නිකුත් කර ඇතැයි අදාළ නිවේදනයේ දැක්විණි.
ශ්‍රී ලංකා පොලිසිය මේ නිවේදනය නිකුත් කර තිබියදී ද වුව ද ඉහතින් දැක් වූ වට්ස්ඇප් (WhatsApp) පණිවුඩය සංසරණය/හුවමාරු වන අයුරු දක්නට ලැබිණි.
නිව්ස්වයර් (Newswire) පුවත් සේවය ද මේ සම්බන්ධයෙන් වාර්තා කර තිබිණි. “Be Careful, Economic Crisis” Police says fake message circulating linking Police
ශ්‍රී ලංකා පොලිසිය මඟින් මහජනතාව දැනුවත් කළ යුතු කරුණු තිබේ නම් පොලිස් මාධ්‍ය කොට්ඨාසය මඟින් මාධ්‍ය නිවේදන ලෙස ඒවා නිකුත් කරන බව ද පොලිස් මාධ්‍ය කොට්ඨාසය නිකුත් කළ නිවේදනයේ දැක්විණි.
නිගමනය : “සියලු දෙනා ම කියවිය යුතු පොලිස් පණිවුඩයක්” යනුවෙන් පොලිසිය සම්බන්ධ කරගනිමින් වට්ස්ඇප් (WhatsApp) පණිවුඩජාලය තුළ හුවමාරු වන පණිවුඩය ව්යාජ යි.
